ബിപി അഥവാ രക്തസമ്മര്‍ദം പലര്‍ക്കുമുള്ള പ്രശ്‌നമാണ്. സാധാരണ പ്രായമായവര്‍ക്ക് ഇത്തരം പ്രശ്‌നമുണ്ടാകാറുണ്ട്. എന്നാല്‍ ഇന്നത്തെ കാലത്ത് ചെറുപ്പം പ്രായമുള്ളവര്‍ക്കും ഈ പ്രശ്‌നം ഉണ്ടാകുന്നത് സാധാരണയാണ്. കാരണം പലതാകാം. പാരമ്പര്യമായി ഉണ്ടെങ്കില്‍ ഇതുണ്ടാകാന്‍ സാധ്യതയുണ്ട്.
ഇതല്ലാതെ ജീവിത ശൈലികള്‍, സ്‌ട്രെസ് പോലുള്ളവയെല്ലാം തന്നെ ഇത്തരം അവസ്ഥയുണ്ടാക്കുന്നു. ഇതു പോലെ പ്രായമേറുമ്പോള്‍ ചിലപ്പോള്‍ മറ്റു കാരണങ്ങളില്ലെങ്കിലും ബിപി ഉയരാന്‍ സാധ്യതയേറെയാണ്. ബിപി നിയന്ത്രിച്ചു നിര്‍ത്തുകയെന്നത് ആരോഗ്യത്തിന് ഏറെ പ്രധാനമാണ്. അല്ലാത്ത പക്ഷം ഇത് സ്‌ട്രോക്ക്, ഹൃദയ പ്രശ്‌നങ്ങള്‍, കിഡ്‌നി പ്രശ്‌നങ്ങള്‍ എന്നിവയ്ക്കു പലതിനും കാരണമാകുകയും ചെയ്യും.
ബിപിയ്ക്ക് മരുന്നു കഴിയ്ക്കുവാന്‍ പലര്‍ക്കും മടിയാണ്. ഇത് സ്ഥിരം കഴിയ്‌ക്കേണ്ടി വരുമോ, അതോ ഇതിന് പാര്‍ശ്വ ഫലങ്ങളുണ്ടോ തുടങ്ങിയ ഭയമാണ് കാരണം. ജീവിതശൈലിയിലെ മാറ്റങ്ങളിലൂടെയും ഭക്ഷണ വ്യായാമ നിയന്ത്രണങ്ങളിലൂടെയും ബിപി കുറയ്ക്കാന്‍ സാധ്യമാണ്. ഇതിനാല്‍ തന്നെ ചെറുപ്പക്കാരില്‍ ബിപി പ്രശ്‌നമെങ്കില്‍ ഇത് മരുന്നു കഴിയ്ക്കാതെ തന്നെ നിയന്ത്രിയ്ക്കാന്‍ സാധ്യത ഏറെയാണ്. എന്നാല്‍ 60 വയസിന് മേല്‍ പ്രായമുള്ളവരില്‍ എത്ര ജീവിതശൈലീ നിയന്ത്രണത്തിലൂടെയും ചിലപ്പോള്‍ ഇത് കഴിയാതെ വരും.
ഇത്തരക്കാര്‍ ഡോക്ടറുടെ നിര്‍ദേശമില്ലാതെ മരുന്നു നിര്‍ത്താന്‍ പാടുള്ളതല്ല. കാരണം ബിപിയുടെ മരുന്നല്ല, ബിപി നിയന്ത്രണത്തില്‍ അല്ലെങ്കിലാണ് സ്‌ട്രോക്ക്, ഹൃദയ പ്രശ്‌നങ്ങള്‍ അടക്കമുള്ളവ വരുന്നത്. തുടക്കത്തില്‍ ബിപി മരുന്നു കഴിയ്ക്കുമ്പോള്‍ ശരീരം അതുമായി പൊരുത്തപ്പെട്ടു വരാന്‍ സമയമെടുക്കും. ഇതിനാല്‍ ക്ഷീണം തോന്നാം, മറ്റ് അസ്വസ്ഥതകള്‍ കാണാം. ഇത് അല്‍പം കഴിയുമ്പോള്‍ ശരിയാകും. എന്നാല്‍ പലരും ഇത്തരം പ്രശ്‌നങ്ങള്‍ കാണുമ്പോള്‍ മരുന്നു കഴിച്ചതിനാല്‍ പ്രശ്‌നമാകും എന്നു കരുതി മരുന്നു ഡോക്ടറോട് ചോദിക്കാതെ തന്നെ മരുന്നു നിര്‍ത്തും.
